UYvonne Vera (1964-2005), ongomunye wabalobi beZimbabwe abaziwa kakhulu, wazalelwa koBulawayo.  Wathola iziqu zobutokotela eNyunivesithi yeYork kweleCanada.  Waphenduka koBulawayo lapha afika khona waphiwa isikhundla sokuba nguMqondisi weNational Gallery kusukela ngomnyaka ka1997 kusiyafika ku2003.  Amanoveli akhe amahlanu asaguqulelwa kuzindimi ezinengi njalo asathola imimvunzo eminengi egoqela lomvunzo womkhono we-Afrika owenhlanganiso yaBalobi beCommonwealth (ngomnyaka ka1997, ngenoveli yakhe ethi Under the Tongue), wathola futhi umvunzo wakoMacmillan owaBalobi owe-Afrika (ngo 2000, ngenoveli yakhe ethi  The Stone Virgins), wathola futhi umvunzo we Italy othiwa Premio Feronia (ngo2003 ngenoveli yakhe ethi Butterfly Burning), kanye lomvunzo weSweden othiwa Pen Tucholksy (ngo 2004) ewuphiwa ngenxa yomsebenzi wakhe wonke otshengisa isibindi esimangalisayo.  Ngaphezu kweqoqo lakhe lezindatshana ezimfitshane, elilesihloko esithi: Why Don’t you Carve Other Animals (1992), indatshana yakhe emfitshane elesihloko esithi: ‘Independence Day’ yangeniswa  egwalweni olulesihloko esithi: The Picador Book of African Stories (2000) njalo indatshana yakhe elesihloko esithi: ‘Writing it Out’ yashicilelwa egwalweni olulesihloko esithi: Writing Still (2003).

Amanoveli kaVera aphinda njalo aphiwa inhlonipho lalapha ekhaya lapha uVera aphiwa khona umvunzo wabashicileli beZimbabwe othiwa: The Zimbabwe Publishers Literary Award ngenoveli yakhe eyabangenhle ukwedlula wonke ngo 1996 (elesihloko esithi: Without a Name) njalo lango 1997 (ngenoveli elesihloko esithi: Under the Tongue).  Imibhalo yakhe seyaguqulelwa ezindimini ezilandelayo: isiJelimani, olweSpain, olweCatalan, olwe-Italy, olweSweden, olwesiDutch, olweDenmark, olweFiniland, olweNorway kanye lolweFrance.  Inoveli yakhe elesihloko esithi: The Stone Virgins yiyo eyokuqala ukuguqulelwa elimini lweSindebele iphiwa isihloko esithi: Izintombi Zamatshe Ezimsula.